| abstract
| - William la concistor (sirca 1028 – 9 setembre 1087) ia es la re normande prima de England, renante de 1066 asta se mori en 1087. Un desendente de invadores vicing, el ia es la duxe de Normandia de 1035. Pos un luta per institui se potia, a 1060 se controla de Normandia ia es secur e el ia comensa la concista de England en 1066. La resta de se vive ia es marcada par lutas per serti se controla de England e se paises continental, e par difisiles con se fio plu vea. William ia es la fio de Robert 1, la duxe de Normandia, ci ia es nonsposida, e se amor Herleva. Se state como un "bastardo", e la anarcia de la anios prima de se rena, ia causa alga problemes per el pos cuando el ia segue se padre como duxe. Entre se enfantia e adolese, membros de la aristocratia normande ia batalia lunlotra, e per controla la duxe enfante e per se propre goles. En 1047, William ia pote crase un rebela e comensa se autoria sur la duxia, cual el no ia pote completi asta sirca 1060. Se sposi en la desenio de 1050 a Matilda de Flandre ia furni el con un aliada potiosa en la contia visina de Flandre. El ia es alora capas de asinia postos como bispos e abades en la eglesa normande a se suportores. E la establi de se potia ia permete ce el estende se rena a la contia de Maine (Frans). En la temprana de la desenios de 1050 e 1060, William ia deveni un competor per la trono de England, alora tenida par Edward la conselor, se tio (de grado du), ci no ia ave enfantes. On ia ave otra competores, incluinte la duxe potiosa engles Harold Godwinson, ci ia es nomida como la re seguente par Edward a se leto de mori en janero 1066. William ia declara ce Edward ia promete plu temprana la trono a el, e ce Harold ia jura ce el va suporta la direto de William. William ia construi un marina grande e ia invade England en Setembre 1066, vinsente e matante Harold a la Batalia de Hastings a 14 otobre 1066. Pos plu ativia militar, William ia es coronida como re a natal de 1066. El ia prepara per se governa de England en la temprana de 1067 ante reveni a Normandia. Alga rebelas ia segue e fali, e ante 1075, la teni de England ia es, per la plu, secur, e esta ia permete ce el pasa la majoria de se rena a la continente. La anios final de William ia es marcada par difisiles en se dominas continental e con se fio, e par menasas de invades de England par la dansces. En 1086, William ia comanda la crea de la Domesday Book ("la libro de judi final"), un lista de tota propriores en England e se proprias. William ia mori en setembre 1087 cuando el ia gida un campania en Frans norde, e ia es enterada en Caen. Se rena en England ia es marcada par la construi de casteles, la coloni de nobiles normande en England, e un cambia de la composa de la eglesores engles. El no ia atenta uni se dominas en un impero, ma en loca el ia continua governa cada parte separada. Pos se mori, la paises ia es divideda entre se fios: Robert 2, se fio prima, ia reseta Normandia, e William, se fio du, ia reseta England.
|
![[RDF Data]](/fct/images/sw-rdf-blue.png)