| abstract
| - Filastin ia es un pais fertil, calda e acuida par la pluves mediteraneo - un loca multe desirada. Lo ia reposa entre la sosias sofisticada Egipte e Mesopotamia, cual fa ce lo ia es un loca ideal per comersia e, natural, gera. Seguente tradision, la ivri ia veni de Ur en Mesopotamia con padre Abraham sirca 2000 aec, ance con sua "dio de la monte" El Xadai. Lo es plu probable ce los ia es nativa en la area alga a la este e ce los ia concista sua relatada prosima, la cananes, per funda sua rena istorial. Gera constante ia resulta evidente en la sclavi de un grande parte de la ivris par la egipsianes. Esta ia crea la stadio per la aveni la plu importante de la istoria de la iudis, la exodo, pd la parti. Moxe, probable un egiptian, ia aida la ivris caturada en sua tempo de nesesa, posible par introdui la la leges de puria en un periodo de pesta. Sirca 1300 aec, el ia gida los, on dise, a retro a Filastin, do los ta ave un influe enorme sur sua frates ancora ala. La ivris ia organiza se entre 12 tribus, con gerores-pretes como xefes, cual la biblia clama la judores. Geras entre tribus ia condui los a un xerca per un monarca simil a la res ce los ia vide en Egipte e Mesopotamia. Sirca 1010 aec, los ia trova acel monarca en un xef de gera nomida Saul. Sola cuatro anios plu tarda, se trono ia es prendeda par David, sua fio par sposi. Pos la defeta de la filastines - "la popla de la mar" (posible elinicas antica) ci ia coloni la costa - David ia fundi sua capital Jerusalem. En 966 aec, David ia es segueda par Solomon. Sur sua rena, la ivris ia deveni rica, investinte en comersa entre Fenisia e Egipte, e vias maral a Arabia e Africa este. Solomon ia comanda ce un templo ia es construida en Jerusalem per conteni "la arca de la acorda". La arca ia es un caxa de lenio, covreda con oro, cual ia conteni, suposada, la tabletas de la lege cual Moxe ia reseta de Dio mesma a monte Sina. Lo ia es la simbol la plu santa de Iaue, e los ia crede ce lo ta dona potia supra sua enemis. La ivris ia es orijinal politeiste, an animiste. Los ia crede en spiritos e, como pastores, ia es spesial dedica a cultos de la bove, la ovea, etc. Sacrifia de animales ia es la tradision, plu comun a altares local e en areas savaje. Los ia divina con dados, alga cosa cual los ta continua per multe sentenios. On debe nota ce multe de la capitol de la biblia nomida "la crea" (o "jenese") es composada de mitos comun de la rejion (e multe otra rejiones), como la narada de crea, la cade de umania, la deluvia, etc. Iaue, posible la dio canan nomida Iehu o Iau, ia deveni la dio "nasional" de la ivris. Cuando Solomon ia construi la templo en Jerusalem, Iaue ia es nomida la dio la plu grande de tota. El ia mostra multe cualias uman, como jelosia, regrete, coleria, ama de la odor de ofres ardeda, e un tende per aseta soborna. Crede temprana no ia conteni la conseta de enferno. En loca, on ave Xeol, un pais de oscuria su la tera. Ma, como Hade per la elinicas e Hel per la germanicas, Xeol ia es la abitada de cuasi tota mores, e no sola los ci ia peca. Nonplasente, lo no ia es un loca de tortura eterna. Sola un poca peti de persones ia vade a paradiso per vive con la dios! La relijio ia ave multe leges - multe de los, e simil a la leges de la Indus. Pecas pote es sutraeda par preas e sacrifia, e nonpuria (con causas como menstrua e pari) par puri ritual, tota controlada par un casta de pretes. Ultra la Des Comandas, la Leges de Moxe ia regula tota la vive per la ivris: dieta, ijenia, medica, an seso. Pos Solomon, la state de la tribus ivri ia comensa dejenera. Clases rica e povre ia developa, e la casta de pretes (la desendentes de Levi) ia deveni plu e plu potiosa. La rena de Solomon ia fende entre Israel en la norde e Judea en la sude. En 722 aec, Sargon du, la imperor asirian, concista la area intera. La asirianes ia es multe savaje e la ivris, como otras, ia sufri multe. En la eda de sua rena supra Filastin, un cuantia de estremistes ivri ia deveni influente. Los ia despeta la ricas e la pretes, e ia predise ce la ruina de la ivris ia es causada par sua propre pecosia. Esta predisores ia es la profetas de la biblia: Amos, Hosea, Elija, e Isaia. Re Josia ia rena la area de 639 s 609 aec. El e sua pretes ia vide la nesesa per un codigi de la tradisiones ivri per furni unia entre la popla. En 622 aec, los "descovre" (o creada) un libro rolada suposada scriveda par Moxe, e nomida lo la Libro de la Acorda, o la Lege. Lo ia es probable la plu de Deuteronomio e partes de Esodo (xx a xxiii?). La rola ia es lejeda a vose plen tra du dias, e ia deveni un susede. Con esta suporta, Josia ia comensa destrui la idoles a otra dios en Filastin. En 587 aec, en la media de un gera entre Egipte e Babilonia, la re babilonian Nebucadnesar ia invade Filastin, e ruina la parte grande de Jerusalem, incluinte la Templo. El ia prende multe de la popla de Jerusalem como sclavos e move los a Babilon. Esta aveni es nomida "la Catura Babilonian". Ante la catura, Jeremia ia dona sua avertis, e plu tarda Ezekiel ia reproxa la iudis per aplica esta a se mesma denova. Ance sirca esta periodo ia es un profeta nomida Isaia, ci ia developa un imaje nova de Iaue. Sua Dio ia es la sola Dio, e el ia es la imaje de ama e compatia. E sua vinse ultima supra la mal de esta mundo ta es traeda par un salvor, la Maxia (ivri per "la unjeda") En 539, Korux, re de Persia, ia concista Babilonia e ia fa ce Filastin ia deveni un parte de la Impero Persian. El ia libri la iudis babilonian e ia restora sua ricas, e los ia reveni a Jerusalem. Los ia suprasede la colonistes noniudiste, ia reconstrui la templo, e ia reinstitui la rena de pretes e la lege de Moxe. Ezra, en 458 aec, ia comanda ce esta lege ia es lejeda a vose plen. A esta ves, la leje ia dura du semanas, car la colie ia inclui aora la tota sinco volumes de la Tora. La forma moderna de la Tora (la sinco libros prima de la Biblia) ia es developada ante 300 aec. Eruditas moderna pensa ce la Tora ia ave sinco autores (o grupos de autores): • "J" (per Iaue) ia usa Iaue per la nom de Dio, e ia es probable de Judea. El ia es videda como la scrivor de la plu de Jenese, Esodo, e Numeros. • "E" (per Elohim) ia usa Elohim en loca de Iaue, e ia es probable de Israel. El ia scrive la resta de Jenese, Esodo, e Numeros. J e E ia es probable integrada pronto pos 722 aec. • "D" representa la pretes de Levi ci ia construi Deuteronomio, probable no multe ante 622, cuando Re Josia ia "descovre" lo. • "P" (per codigo de pretes) inclui la jenealojias e rituos en la libros ja notada, e Levitico. Lo ia es scriveda no multe ante Re Josia ia mori, en 609 aec. Algas crede ce P ia es scriveda par Jeremia. • "R" (per "revisor" o "editor") ia combina J, E, e P en la sinco libros prima de la Tora, e alora ia ajunta D. Algas crede ce el ia es Ezra. En 332 aec, Alexandro la Grande ia prende Jerusalem. Los ia sede sin combate. Alexandro ia es, suposada, un amiror de la iudis e sua Dio. Esta ia introdui un periodo longa de rena elinica - e la "elinici" acompaniante - cual ta afeta iudisme multe. Estra un tradui elinica nomida la Septuagint (setedes, referente a la setedes traduores iudiste cual ia tradui suposada la Tora), la profetas ia es ajuntada en esta periodo, e ance Job, Salmos, Proverbos, Eclesiaste, e la Canta de cantas. La developa de un comunia iudi elinicida en Alexandria (Egipte) ia condui a un fende entre esta iudis libral e la iudis plu tradisional de Filastin. Ance, la samarianes, ci ia abita Israel orijinal, ia sutrae se de la iudis de Judea, reteninte sola la Tora orijinal como sua scrivedas santa. En 168 aec, Simon Macabeo ia prende Judea de la manos de la seguor de Alexandro (pd la seleucanes), e ia comensa sua propre dinastia. Ma en 63 aec, Pompei ia concista la area e fa ce Judea deveni un parte de la provinse roman Suria. La sento anios pos ia es esensal per la iudis. En 37 aec, iudis nasionaliste, aliada con la invadores de Partia, ia revolta. La romanes ia asinia Herod ("la grande") como re de la iudis du anios a ante, e el ia repulsa la invadores e ia elimina sua suportores iudi. El ia rena la area asta cuatro aec (posible la anio en cual Jesus ia nase). Filastin ia ave probable un popla de sirca du e dui milion persones a esta ora, con alga 100,000 persones en Jerusalem. Tre setas ia deveni influente entre la iudis: • La saduceos ia es un grupo multe conserviste e nasionaliste. Los no crede en nonmortalia. • La fariseos ia crede en un aplica sever de la lege, e ia ajunta un tradision parlada. Los ia crede en nonmortalia, e ia es plu asetante de la romanes. • La esenis ia es un tradision estrema moncal, posible influeda par budisme. Los crede ce un Maxia ta fundi un rena de sielo, a cual sola la "pur" ta es permeteda entra. Tra tempo, la governa de Filastin - per la plu parte par iudi asiniada par la romanes - ta dejenera a noncapasia e froda. Grupos de zelosa ia leva ci jura ce los ta mata tota iudis nonfidosa. Los ia mata alga multe de los, e multe paganes ance. La paganes de la area ia responde en la mesma modo. Imperor Vesapsian ia envia sua fio Tito con armadas roman a Filastin e Tito ia ofre un salda pardonosa. La zelosas ia rejeta sua ofre, e donce la armadas roman ia masacra los. En 70 ec, Tito ia comanda ce la Templo ta es destruida e la iudi ta es sperdeda, un aveni nomida la diaspora. Miliones de iudis ia es sperdeda tra la impero, cual ia conteni alga sete milion iudis, cuasi sete persento de la popla de la impero. Con la diaspora, la saduceos ia desapare e la fariseos, con sua instruores - la rabis - ia manteni la flamas par predise la lege en miles de Sirca 132 ec, on ia ave un otra revolta par iudis. La imperor Hadrian ia nonlegali la ensenia de la lege e ia destrui la parte grande de Judea. Multe iudis ia vade a Babilon, do los ia es bon tratada e ia flori. En sirca 500 ec, los ia completa la Talmud Babilonian, un colie de comentas sur e esplicas de la Lege. En la Impero Roman, la iudis ia es donada sitadania (como tota otras) en 212 ec. Ma los ia es multe odiada par otra sitadanes roman: La iudis ia insiste vesti diferente, selebra festas diferente, come comedas diferente, etc. An plu iritante ia es sua escluinte, sua crede ce los es plu bon ca tota otras, e sua despeta per la dios de otras. La popularia de un seta iudi maxial - cristianisme - fa sola ce cosas deveni plu mal. En 417 ec, Constantino, la imperor cristian prima, ia basi la state de la iudis a sitadanes inferior de la impero. Los ia resta en acel state perilosa per la 1400 anios seguente. Notas: Filastin ia es la nom cual romanes ia dona a la area. Lo deriva de sua nom per la filastinis, la popla ci ia abita la costa a un ves, e ci ia es posible elinicas de Criti o Cipros. La nom la plu vea per Filastin ia es Canan, e oji, natural, nos nomi la plu de la area Israel. La ivris, la cananeses, e la fenisias ia es etnical la mesma popla. Sua linguas ia es no plu ca dialetos de lunlotra, e los ia comparte en la usa de la alfabeta prima. © Direto de autor, C. George Boeree, 2002
|
![[RDF Data]](/fct/images/sw-rdf-blue.png)