Piotr la grande (9 junio 1672 – 8 febrero 1725) ia es la tsar de Rusia e, plu tarda, de la Impero Rusce de 7 maio 1682 asta sua mori (con sua duifrate Ivan 5 ante 1996). En 1697, el ia visita Amsterdam e otra sites de Europa ueste, e ia deside ce Rusia debe pote asede la mar. Per reali esta intende, el ia comanda la construi de la site e porto San Petersburg, cual ia deveni la capital de Rusia en 1711. Par geras susedosa, el ia estende la tsaria a un impero multe plu grande, e Rusia ia deveni un potia major en Europa. El ia condui ance un revolui cultural cual ia cambia alga de la sistemes political e sosial medieval a un nasion european moderna, envolveda en siensa, e fundida en la Eda de Lumina. Multe de la reformis cual Piotr ia fundi es ancora un parte de la cultur e politica de Rusia.