La Mar Caspio es la corpo de acua incluida la plu grande sur tera. Per esta razona, multe prefere dise ce el es un lago. El es bordada a la norde par Rusia e Cazacstan, a la ueste par Rusia e Azerbaijan, a la este par Casacstan e Turcmenistan, e a la sude par Iran. La surfas ave un area de 371 000 km2, la volum es sirca 78 200 km3, e la profondia masima es 1025 metres. La surfas de la mar es a 27 metres su la nivel promedia de mares. La mar no ave esflues, ma la Rio Volga e la Rio Ural vacui en la mar. La popla de anticia ia regarda la mar como un mar e no como un lago car el es multe grande e car el es salos. El ave un salosia de 1,2%, sirca un tri de la salosia de otra mares.